---

Amol isch a Biable en a arms Leba gschmisaa worra

Wia'n'er hoißt ond wem'er gheird hot koiner gwisst.

A reicher Kaufma, gnädig wia'n'er war.

Hot'an en sei warma Schdub aufgnomma

Hot noch'am guggt ond'an au no zom Sutdiera gschickt.

Bald hot em dem sei Jonga dr Kopf verdreht

Aber do hod von Afang a dr Deifel oms Eck romgspäht.

Ihr Vadder hot was Bessers wella,

's Aufgebot fir an Gscheida bschdella.

Also hot er'n zom Richder zoga,

hot au reachd was zammagloga.

No hen sen en dr Karzer gschperrd,

wia an Hond hot er do plärrt.

Abr no isch's no schlemmer komma,

dr Henker hot en mit sich gnomma.

Er hot en gschdupft ond brennt ond gschla,

des hot er scho ned guad vertra.

Hot an gschnidda, gschdreckt ond zoga

on'am au no's Kriez verboga.

Gschdanda hot er's trotzdem net,

dass er des goldne Häfale hett.

Oinaweag hend se'n schuldig gsprocha, ond jetzt

hot dr Henker's Ägschdle gwetzt.

Bevor sei Meggl liggt em Krädda -

verschona will er den Siach ja edda -

Wenscht dr Student derra Bagasch verzweifelt

d'Pescht an' Hals ind Dod ond Deifel

Gschuggd ond narrad sollad se werra

ond dr liabe Dag lang plärra.

Am Grend isch aber no a Keddele ghengt,

Des hot dr Kaufma mol oira gschenkt.

Obwohl er se mega hot, isch'er ganga,

mit eniem Kendle ließ er sie hanga.

Do ischt em no a Lichd uffganga:

Sei oiga Floisch ond Bluat isch's gwaa,

wo er em Henker blend hot gäa.

Dem Mädle hot's scho's Herz verrissa

's hot bloss no d'Pflätsch naghengt.

Ond bald scho hot sich's wega dem Wissa

en ra kalda Nacht en da Donau versenkt.

Au ihr Alder war no nemme ganz alloi.

Er hot koe Ruah mei gfonda,

gschwätzt hot er mit de Baim, mit de Riaba ond de Schdoi.

Au wenn seine Boener lenggschd em Dreck straggat donda

spukt sei Goischd no am Fluss en nebliche Schdonda.